Mikill viðsnúningur á nýskráningu ökutækja á síðustu vikum

Nýskráðum ökutækjum á fyrstu 130 dögum ársins fækkaði lítillega, eða um 0,6 prósent, á milli ára samkvæmt samantekt Umferðarstofu.

Alls vopu 8.513 ökutæki nýskráð á tímabilinu en þau voru fimmtíu fleiri á sama tímabili í fyrra. Þess má geta að fyrstu 53 daga ársins hafði nýskráning ökutækja aukist um nærri 47 prósent miðað við sama tímabil í fyrra og má því sjá að mikill viðsnúningur hefur átt sér stað á síðustu vikum.

Eigendaskipti ökutækja eru einnig færri það sem af er árinu en á sama tímabili í fyrra. Skráð eigendaskipti fyrstu 130 daga ársins voru tæplega 32.900 en voru nærri 35.200 á sama tímabili í fyrra. Þetta þýðir að eigendaskiptum hefur fækkað um 6,5 prósent á milli ára. Fyrstu 53 daga ársins var hins vegar 2,6 prósenta aukning í eigendaskiptum miðað við sama tíma í fyrra.