,,Það lekur inn í herbergi dóttur minnar"

Guðrún Margrét Steinarsdóttir, íbúi í Þorlákshöfn, gagnrýnir vinnubrögð Viðlagatryggingar Íslands í kjölfar jarðskjálftanna á Suðurlandi í maí. Hún segir að Þorlákshöfn hafi orðið út undan í kjölfar skjálftanna og meiri áhersla sé lögð á að meta byggingar í Hveragerði og Árborgarsvæðinu.

Húsnæði Guðrúnar skemmdist að hennar sögn í sjálftunum og þegar rignir lekur inn í svefnherbergi dóttur hennar sem og eldhús. Að auki eru fimm sprungur í húsinu. ,,Það lekur inn í herbergi dóttur minnar. Okkur ofbýður hvað það hefur tekið langan tíma að fá skemmdirnar metnar."

Guðrún segist hafa hringt í Viðlagatryggingu varðandi málið en fengið þau svör að óvíst er hvenær matsmaður komi og taki út eignina.

Ásgeir Ásgeirsson, framkvæmdastjóri Viðlagatrygginar Íslands, sagði í samtali við Vísi ekki kannast við umrætt mál. ,,Ef þetta er raunin er sjálfsagt fyrir viðkomandi að hafa samband við skrifstofu okkar á Selfossi. Það ætti ekki að taka langan tíma að fá mann til að meta skemmdirnar."

Ekki er búið að meta allar húseignir og mannvirki sem skemmdust í skjálftunum og gerir Ásgeir ráð fyrir að þeirri vinnu verði lokið í árslok.

,,Stærðargráðan er einfaldlega þessi. Við höfum einbeitt okkur af kjarnasvæðum þar sem mestar skemmdir urðu," segir Ásgeir og bætir við að einnig hafi verið lögð áhersla á að meta tjón stærri eigna og þjónustustofnana eins og skóla svo hægt hafi verið að koma þeim í gagnið fyrir haustið.

,,Hraðinn eykst ennfrekar þegar við tökum fyrir eignir sem eru minna skemmdar," segir Ásgeir sem er bjartsýnn á framhaldið.