Ramses ætlar að fagna með handboltaliðinu

Mikil gleði ríkti hjá hjónunum Paul Ramses og Rosemary Athieno þegar Vísir náði tali af þeim í dag. Voru þau á leiðinni að hitta lögfræðing Pauls, Katrínu Theódórsdóttur en höfðu smá tíma til að lýsa hamingju sinni og gleði.

„Góðan daginn! Þakka þér fyrir!," sagði Paul á velskiljanlegri íslensku þegar Vísir bauð hann velkominn til landsins. „Mér líður mjög vel og ég er mjög hamingusamur. Það er frábært að vera á Íslandi aftur, það er eins og að endurfæðast." Paul sagðist hafa í nógu að snúast en sagðist einnig reyna að slaka á og ná sér eftir dvölina á Ítalíu.

Aðspurður hvort það væri eitthvað sérstakt sem hann langaði að gera kominn til landsins sagðist Paul ætla að fagna með íslenska landsliðinu. „Ég er mjög ánægður með íslenska landsliðið í handbolta, ég fann ótrúlega tengingu við liðið, alveg eins og ég væri sjálfur að spila með þeim í Peking," sagði Paul.

Hann var ekki ósáttur við að koma til Íslands í vætuna „Það er fólkið á Íslandi sem skiptir máli, það er hjartað í fólkinu sem skiptir máli," sagði Paul að lokum.