Lögregla kannaði ástand 800 ökumanna

Tæplega átta hundruð ökumenn hafa verið stöðvaðir á ýmsum stöðum á höfuðborgarsvæðinu á ýmsum tímum sólarhrings síðustu dagana í átaki lögreglunnar gegn ölvunarakstri.

Enginn þeirra reyndist ölvaður, eða undir áhrifum fíkniefna, sem lögreglan segir að sé mjög góður árangur. Átakið stendur til áramóta og er í samvinnu við önnur lögregluumdæmi á Suðvesturlandi.

Þetta verklag lögreglunnar var tekið upp fyrir allnokkrum árum þegar brögð voru að því að menn ækju heim af jólaglögg, jólahlaðborðum eða öðrum mannfagnaði á aðventunni. Í fyrstu voru þó nokkrir ökumenn teknir úr umferð en síðan hefur jafnt og þétt dregið úr því.