Þrjátíu þúsund íslendinga gætu lent í greiðsluerfiðleikum

Tæplega þrjátíu þúsund manns sem skulda umfram eignir, gætu lent í greiðsluerfiðleikum á næstu mánuðum vegna aukinnar greiðslubyrði og lækkunar á húsnæðisverði. Seðlabankinn telur að íslenska fjármálakerfið sé traust og bankarnir vel í stakk búnir til að bregðast við áföllum.

Bankastjórar Seðlabankans kynntu árlega skýrslu sína um fjármálastöðugleika í dag. Í megindráttum er það mat Seðlabankans að íslenska fjármálakerfið sé traust, þótt bankarnir glími nú við lausafjárvanda.

Bankinn hefur þó gripið til ýmissra úrræða til að létta þrýstingi á bönkunum, þannig að lán Seðlabankans til viðskiptabankanna hafa aukist verulega. Staða heimilanna er einnig traust að mati bankans, því þau eiga að jafnaði mun meiri eignir en skuldir.

Þeir sem eru viðkvæmastir eru þeir sem skulda meira en 100 prósent af eignum sínum, en samkvæmt upplýsingum Seðlabankans sem ná til ársins 2006 hefur þeim fjölgað verulega. Hér sést að á árunum 1999 til 2005 skulduðu um sjö þúsund pör meira en þau áttu, en þeim snarfjölgar árið 2006 í 8.500 pör.

Þróun í þessa átt hefur verið hraðari hjá einstaklingum en um 8. 500 einstaklingar skulduðu meira en eignir árið 2006, samtals rúmlega 25 þúsund manns, en þessi tala hefur að öllum líkindum hækkað að mati Seðlabankans.