Sakar RÚV um að kynda undir sleggjudómum og ofstæki

Tryggvi Gíslason, fyrrverandi skólameistari Menntaskólans á Akureyri, sakar Ríkisútvarpið um að kynda undir sleggjudómum og ofstæki í tengslum við umfjöllun Kastljóss í gær og Silfur Egils fyrir tíu dögum.

Í bréfi sem Tryggvi ritar Páli Magnússyni útvarpsstjóra segir að RÚV skuli vera hlutlaus og hlutlægur fréttamiðill. Gagnrýnir Tryggvi framgöngu Sigmars Guðmundssonar í viðtali við forsætisráðherra í gær og segir hann hafa krafið forsætisráðherra svara við spurningum sem ógerningur væri að svara. Þá gagnrýnir hann framgöngu Egils Helgasonar í Silfri Egils fyrir tíu dögum.

„Í erfiðleikum, sem steðjuðu að þjóðinni fyrir 40 árum, var talað um alþingi götunnar. Þá gegndi Ríkisútvarpið mikilverðu hlutverki við að afla hlutlægra upplýsinga og skýra á yfirvegaðan hátt stöðu og framvindu mála. Nú, þegar alvarlegustu þrengingar í sögu íslenska lýðveldisins, kreppa að fólki og allir eiga um sárt að binda og enginn veit sitt rjúkandi ráð, kyndir Ríkisútvarpið undir sleggjudóma, ofstæki og fer með fávíslegt tal," segir Tryggvi í bréfi sínu. Spyr hann enn fremur hvort þetta sé gert með vilja og vitund útvarpsstjóra.

Í svari Páls Magnússonar útvarpsstjóra kemur fram að hann sé hjartanlega ósammála Tryggva. „Almennt tel ég að fremur megi gagnrýna íslenska fjölmiðla fyrir linkulega framgöngu við valdamenn - kjörna, skipaða og sjálfskipaða - en hið gagnstæða. Kannski mætti segja að hlutur fjölmiðla í hinni margumtöluðu og margþættu ábyrgð á núverandi ástandi felist einmitt í því, - skorti á aðgangshörku.

Í Kastljósi í gær og Silfri Egils þarsíðasta sunnudag var spurt þeirra spurninga sem brenna á vörum almennings, - sama almennings og nú er um það bil bil að axla reikning upp á nokkur hundruð milljarða króna fyrir það hvernig íslenskir auðmenn og íslensk stjórnsýsla hafa haldið á málum. Með sama hætti og flestir hafa skilning á því að forsætisráðherra getur að svo komnu máli ekki svarað öllum þessum spurningum er ég viss um að hann sjálfur hefur skilning á því að þeirra sé spurt. Það er einmitt m.a. hlutverk fréttamanna/þáttastjórnenda að spyrja fyrir hönd umbjóðenda sinna, - spyrja eins og stjórnandinn telur að áhorfendur/hlustendur myndu sjálfir vilja spyrja," segir Páll.

Hann segist enn fremur telja að Ríkisútvarpið hafi staðið fyrir áreiðanlegum, hlutlægum, hófstilltum, sjálfstæðum og traustum fréttaflutningi af þeim þrengingum sem nú steðja að þjóðinni. „Af áhorfs-, hlustunar- og trúverðugleikamælingum má ráða að þjóðin er sama sinnis. Að saka Ríkisútvarpið um að hafa "...gengið í lið með dómstól götunnar, skrílmenningu..." eða kynda undir "...sleggjudóma, ofstæki..." er - og best að halda sig við hófstillt orðalag - ósanngjarnt," segir útvarpsstjóri enn fremur.