Vaxandi verðbólga bitnar illa á öryrkjum

Aðalstjórn Öryrkjabandalags Íslands lýsir þungum áhyggjum sínum yfir bágri fjárhagsstöðu fjölda öryrkja og sjúklinga vegna sívaxandi verðbólgu og hækkandi verðlags á nauðsynjavörum.

Í ályktun frá bandalaginu segir að vaxandi hópi öryrkja reynist illmögulegt að láta enda ná saman vegna þessa. Þar segir enn fremur að treyst sé á að í fjárlögum næsta árs verði að finna umtalsvert auknar fjárhæðir til handa þeim sem verst standa í íslensku samfélagi.

Bendir Öryrkjabandalagið á að á meðan lágmarkslaun hækkuðu um 18 þúsund krónur í nýgerðum kjarasamningum hækkaði lífeyrir almannatrygginga einungis um 7 prósent, eða sem nemur níu þúsund krónum ef einstaklingur hefur fulla greiðslu úr öllum fjórum bótaflokkum almannatrygginga, en lítill hluti öryrkja hefur slíkt. Þá er minnt á að Jóhanna Sigurðardóttir félags- og tryggingamálaráðherra hafi boðað framfærsluviðmið sem átti að koma 1. júlí síðastliðinn en það hafi ekki enn litið dagsins ljós.

„Þær umbætur sem gerðar hafa verið á almannatryggingakerfinu á árinu eins og afnám tekjutengingar við maka, 100.000,- króna frítekjumark á mánuði á launatekjur, og 25.000,- króna frítekjumark á lífeyrissjóðstekjur hefur komið ákveðnum hópi til góða, en það hefur ekki nýst öllum öryrkjum," segir í ályktun ÖBÍ.