Verkstæði og rafstöðvar Ístaks á Grænlandi brunnu til kaldra kona

Verkstæðisbygging, rafstöðvar og lager Ístaks á vesturströnd Grænlands brann til kaldra kola í morgun sem þýðir að vinna við vatnsaflsvirkjun sem fyrirtækið er að byggja stöðvast.

Loftur Árnason, framkvæmdastjóri Ístaks, segir í samtali við Vísi að eldsins hefði orðið vart um klukkan sex í morgun og reyndu starfsmenn að slökkva hann en tókst ekki. Virkjunin er fjarri mannabyggðum og aðeins hægt að komast á staðinn sjóleiðina þannig að ekki var hægt að kalla til slökkvilið með skömmum fyrirvara. Næsti bær við virkjunina er Sisimiut, sem er nærstærsti bær Grænlands, og er virkjað í þágu hans. Engan sakaði í brunanum en meðal þess sem brann voru þrjár 500 vatta rafstöðvar sem notaðar hafa verið við framkvæmdirnar.

Loftur segir að tjónið sé töluvert, ekki síst vegna þess að nú stöðvast vinna við verkið á meðan unnið er að því að finna nýjar rafstöðvar og flytja þær á staðinn. Hann treystir sér þó ekki til að meta tjónið nákvæmlega á þessari stundu.

Um 80 manns vinna við gerð virkjunarinnar, flestir Íslendingar en einnig Grænlendingar og Slóvakar. Hófst vinna við virkjunina í fyrravor. Að sögn Lofts er um að ræða verk upp á sjö milljarða króna og fór fyrsta árið í að byggja upp vinnubúðir og verkstæði á staðnum. Byrjað var á jarðgangagerð vegna virkjunarinnar í fyrrahaust og eru menn einnig í steypuvinnu eftir að hafa sprengt út fyrir stöðvarhúsi virkjunarinnar.

Samkvæmt upplýsingum á heimasíðu Ístaks er um 15 megavatta virkjun að ræða og á hún að vera tilbúin 2010. Einnig felst í samningi Ístaks við Orkustofnun Grænlands rekstur virkjunarinnar í fimm ár eftir gangsetningu.