Íslenski fanginn á leið heim

Fannar Gunnlaugsson, íslendingurinn sem hefur mátt dúsa í rúman mánuð í fangelsi í Nevada í Bandaríkjunum fyrir að endurnýja dvalarleyfi sitt tveimur dögum of seint, er á leið til Íslands.

Afi hans, Hafsteinn R. Magnússon, segist hafa heyrt í föður Fannars fyrir stundu og að hann hafi sagt honum að Fannar væri á leið heim. „Pabbi hans reyndi að hitta hann í fangelsinu í morgun til þess að láta hann fá farangur og þess háttar en honum var meinað að hitta hann," segir Hafsteinn.

„Hann fékk ekkert nema ónot frá fangelsisyfirvöldum en hann greip á það ráð að keyra út á flugvöll og sitja fyrir þeim þar. Þar hitti hann strákinn og gat komið eigum hans til hans," segir Hafsteinn. Fannar mun fljúga frá Nevada til Minneapolis og þaðan til Íslands þar sem hann lendir í fyrramálið.