Rúmenarnir jarðsungnir í dag

Mennirnir tveir sem létust í aðveituröri í Hellisheiðarvirkjun í síðustu viku verða jarðsungnir í heimalandi sínu, Rúmeníu, í dag. Mikið kapp var lagt á að koma líkum þeirra heim til greftrunar innan þriggja daga vegna trúar þeirra en það tókst ekki.

Mennirnir tveir tilheyrðu Rétttrúnaðarkirkjunni í Rúmeníu og samkvæmt henni og rúmenskri hefð skal jarðsetja fólk innan þriggja sólahringa frá andláti.

Líkin voru ekki flutt úr landi fyrr en á laugardaginn en þá voru tæpir þrír sólahringar frá því mennirnir létust. Gunnar Pétursson, vinnuveitandi mannanna hjá Vélsmiðjunni Altaki, segir allt hafa verið reynt til að koma líkum mannanna heim til Rúmeníu í tæka tíð en það hafi því miður ekki tekist.

Líkin fengust ekki afhent fyrr en eftir krufningu á föstudaginn. Samkvæmt upplýsingum frá lögreglu var allt gert til að hraða því ferli.

Mennirnir tveir störfuðu fyrir Altak við Hellisheiðarvirkjun en vélsmiðjan sér um járnsmíði þar. Síðdegis á miðvikudaginn var þeim falið að gera gat á aðveiturör á svæðinu en um leið sagt að fara ekki inn í það. Verkstjóri kom síðar að mönnunum þar sem þeir lágu inni í rörinu. Lífgunartilraunir báru ekki árangur. Mennirnir köfnuðu en ekki liggur fyrir hvort það var vegna súrefnisskorts eða eitrunar.

Oddur Árnason, yfirlögregluþjónn á Selfossi, segir endanlega niðurstöðu krufningar ekki liggja fyrir fyrr en í fyrsta lagi í næstu viku.