Lögreglan á Vestfjörðum hefur upplýst þjófnaðarmál á bensínstöðinni á Ísafirði þaðan sem verulegum fjármunum var stolið aðfaranótt mánudagsins 5. maí sl.
Lögreglan handtók fjóra menn á aldrinum 16 til 18 ára í þágu rannsóknar málsins. Lögreglustjórinn á Vestfjörðum fór fram á gæsluvarðhald yfir þremur þeirra í þágu rannsóknar málsins og var einn úrskurðaður í gæsluvarðhald til föstudagsins 9. maí nk.
Hafa þeir allir viðurkennt aðild sína að málinu og var þeim sleppt að loknum yfirheyrslum. Þýfið fannst og hefur verið komið til skila.
