Sviku fé út af kortum Skagfirðinga

Lögreglan á Sauðárkróki rannsakar ásamt lögreglunni á Akureyri hvernig glæpamönnum tókst að svíkja um tvær milljónir króna út af kreditkortum. Svo virðist sem að þeir hafi komist yfir kreditkortanúmerin í Skagafirði og notað þau svo til að kaupa vörur í Bandaríkjunum.

Á vefnum Skagafjörður.com er sagt frá því í dag að nokkrir kortaeigendur í Skagafirði hafi í sumar orðið varir við óeðlilegar úttektir af kreditkortum sínum þar sem kort þeirra voru notuð í Bandaríkjum án þess að þeir hafi lagt leið sína þangað.

Eftir að þeir höfðu samband við fyrirtækið Valitor, sem er umboðsaðili Visa á Íslandi, var málið kært til lögreglunnar á Sauðárkróki sem hefur ásamt lögreglunni á Akureyri rannsakað málið frá því í síðasta mánuði. Alls er talið er að um tvær milljónir króna hafi verið sviknar út af kortunum.

Grunur leikur á að einhverskonar kortalesarabúnaði hafi verið komið fyrir á fleiri en einum stað í bænum og óprúttnir náungar þannig komist yfir kortanúmerin. Þeir hafi svo notað þau til að svíkja út um tvær milljónir króna í Bandaríkjum. Flestar úttektirnar voru gerðar í verslunum í Flórída.

Samkvæmt upplýsingum frá Valitor hefur fyrirtækið gert ráðstafanir til að reyna að tryggja að ekki sé hægt að nýta frekar þau kortanúmer sem þjófarnir náðu mögulega að nálgast.

Lögreglan vill lítið gefa upp um rannsóknar málsins á þessu stigi en segir engan enn hafa verið handtekinn í tengslum við málið.