Vg leggur fram frumvarp um breytingar á eftirlaunalögum

Þingflokkur Vinstri- grænna hefur lagt fram frumvarp á Alþingi um að afnema sérréttindi æðstu embættismanna sem kveðið er á um í hinum umdeildu eftirlaunalögum.

Samkvæmt frumvarpinu sem lagt var fram í dag er gert ráð fyrir að þessi hópur greiði iðgjöld til lífeyrissjóðs starfsmanna ríkisins og njóti frá og með þeim degi réttinda samkvæmt reglum A-deildar LSR. Í frumvarpinu er einnig lagt til að allar launagreiðslur til þessa hóps umfram 450 þúsund krónur skerðist um 20 prósenta í átt til launajöfnunar í landinu á erfiðum tímum.

Fram kemur í tilkynningu Vinstri - grænna að Steingrímur J. Sigfússon, formaður flokksins, hafi upplýst formenn annarra stjórnmálaflokka um þetta á fundi í morgun.

„Steingrímur sagði þolinmæði þingflokks Vinstri grænna þrotna að bíða þess að eitthvað gerðist í málinu af hálfu ríkisstjórnarinnar og stjórnarflokkanna. Ríkisstjórnin hefði nú setið að völdum í eitt og hálft ár með yfirgnæfandi þingmeirihluta og ákvæði um endurskoðun eftirlaunalaganna í stjórnarsáttmálanum en enn hefði ekkert gerst og engin hreyfing verið á málinu mánuðum saman. Jafnvel hefði verið látið í veðri vaka að málið strandaði á stjórnarandstöðunni, sem væri tilhæfulaust. Nú hefði ríkisstjórnin tækifæri til að samþykkja frumvarp þingflokks VG sem fæli í sér svipaða nálgun og frumvarp nokkurra þingmanna Samfylkingarinnar frá síðasta þingi," segir í tilkynningunni.

Vinstri - græn hafna því að ekki sé hægt að gera breytingar á eftirlaunalögunum fyrir áramót. Við núverandi aðstæður í þjóðmálum væri einboðið að Alþingi tæki af skarið og kæmi sérréttindum eftirlaunalaganna út úr heiminum fyrir jól. „Það er jafnframt skoðun þingflokks VG að í beinu framhaldi af afnámi eftirlaunalaganna beri Alþingi að taka til skoðunar þær greiðslur til þingmanna sem ákvarðaðar eru af þinginu sjálfu í sama tilgang," segir enn fremur í tilkynningunni.