FÍB sér fram á frekari eldsneytishækkanir í sumar

Runólfur Ólafsson, framkvæmdastjóri Félags íslenskra bifreiðaeigenda, segist sjá fram á frekari eldsneytishækkanir yfir sumarmánuðina umfram þær sem þegar eru komnar fram.

„Við höfum farið fram á það við stjórnvöld að þau komi til móts við almenning og hjálpi fjölskyldunum þegar svona illa árar. Við höfum lagt það beint til að svokallað vörugjald af bensíni verði lagt af sem er 9,28 krónur en 12 krónur í útsölu vegna virðisaukans.

Við höfum lagt til að díselolían verði lækkuð sambærilega en á móti yrðu þær umframtekjur, sem ríkissjóður hefur haft vegna virðisaukaskattstekna vegna hækkunar á heimsmarkaði, nýttar til að standa straum af kostnaði við vegagerð," segir Runólfur.

Hann segir virðisaukaskatt svo leggjast ofan á vörugjaldið þannig að úr verði skattur á skatt.

„Það eina sem við höfum heyrt er að það sé ólíklegt að nokkuð verði gert. Við viljum þá bara fá það skýrt fram frá stjórnvöldum ef þau ætla ekki að gera neitt," segir Runólfur enn fremur, inntur eftir því hvort hann eigi von á viðbrögðum stjórnvalda.

„Það er ekki lengra síðan en tvö og hálft ár að ýmsir af þáverandi þingmönnum Samfylkingarinnar lögðu fram frumvarp til laga um lækkun gjalda á bensín og díselolíu. Einhverjir af þeim sem þá voru í forsvari eru ráðherrar í dag. Þetta er varla eitthvað sem menn hafa breytt um skoðun á þó að heimsmarkaðsverð hafi hækkað. Ef þá var þörf á lækkun er hún mjög mikil nú," segir Runólfur að lokum.