Minnihlutinn vill auka fjárstreymið til Strætó bs en ekki skera niður

Það er með ólíkindum að á sama tíma og meirihlutinn leggur til framkvæmdir við Geirsgötu og Mýrargötu sem kosta munu á annan tug milljarða til úrlausna fyrir einkabílinn sé verið að leggja til niðurskurð á þjónustu Strætó bs upp á 300 milljónir króna. Svo segir í ályktun frá minnihlutanum í borgarstjórn.

Á fundi umhverfis- og samgönguráðs í dag var rætt um sparnaðartillögur meirihlutans um Strætó bs og setti minnihlutinn á dagsskrá tillögu þar sem lagt var til að í stað fyrirhugaðs niðurskurðar í þjónustu Strætó bs vegna 300 milljón króna kostnaðarauka, leggi Reykjavíkurborg fram aukið fjárframlag til að mæta auknum kostnaði á þessu ári. Tillögunni var hins vegar frestað.

Í ályktuninni frá minnihlutanum segir jafnframt: ,,Samkvæmt greinargerð Alta ehf um áætlaða losun gróðurhúsaloftegunda frá bílaumferð í Reykjavík mengar strætisvagn á við fjóra einkabíla. Í mörgum tilfellum þyrfti því ekki nema fjóra farþega í strætó til að eyðsla og koltvísýringslosun á hvern farþega sé hin sama. Í sömu greinargerð kemur enn fremur fram að dregið hefur úr akstri Strætó bs á undanförnum tveimur árum. Það er nú ljóst að meirihlutinn er að heikjast [sic] á grænu skrefunum og hástefndum yfirlýsingum um jafnræði allra samgöngumáta og miklu betri Strætó um leið og hann stefnir að lausnum sem auka munu mengun í borginni. Umhverfis- og lýðheilsusjónarmið, hækkandi olíuverð og versnandi staða alþýðuheimila ætti að verða til þess að borgaryfirvöld leggðu meira upp úr þeim ódýra samgöngukosti sem almenningsvagnar eru, í stað þess að draga úr þjónustunni. Það er löngu tímabært að allir samgöngumátar verði raunverulega settir við sama borð og fjármagni úthlutað í samræmi við háleit markmið um græn skref í umhverfisvænni borg."