ASÍ vonsvikið með hækkanir hjá fyrirtækjum hins opinbera

Alþýðsamband Íslands er vonsvikið með þær hækkanir hjá opinberum aðilum sem fram koma í nýjustu tölum Hagstofunnar. Vonast hafði verið til að opinber fyrirtæki héldu að sér höndum við verðlagshækkanir en fyrirtæki á borð við Póstinn og Ríkisútvarpið hafa hækkað verðskrár sínar sem skilar sér í hækkun vísitölu neysluverðs.

„Það eru þarna miklar hækkanir á mat og drykk sem auðvitað vekja alltaf athygli þar sem það er liður sem hefur mikil áhrif dags daglega hjá fólki," segor Henný Hinz hjá hagdeild ASÍ. „En það sem vekur sérstaklega eftirtekt okkar eru hækkanir hjá opinberum aðilum og fyrirtækjum þeim tengdum. Við höfðum nú vonast eftir því að menn myndu halda aftur af sér þar, axla ábyrgð og hreinlega stöðva allar hækkanir á svona gjaldskrám," segir Henný.

„Þessar tölur eru okkur því nokkur vonbrigði því þarna eru Pósturinn og Útvarpið að koma fram með hækkanir og eins veit ég til þess að orkufyrirtækin hafa verið að hækka þó að þær hækkanir dreifist yfir fleiri tímabil." Að sögn Hennýjar eru þetta allt samana hækkanir sem skila sér beint út í vísitöluna og þótt hækkanir hjá þessum aðilum hafi minni áhrif en hækkanir á mat og húsnæði þá telji allt.

„Við viljum enn og aftur brýna það að söluaðilar vöru og þjónustu og ekki síður opinberu aðilarnir haldi aftur af sér eins og kostur er við að hækka hjá sér," segir Henný Hinz að lokum.