Fréttastofur Ríkisútvarpsins og sjónvarps sameinaðar

Fréttastofur Ríkisútvarpsins og íþróttadeild hafa verið sameinaðar undir merki fréttastofu RÚV. Þetta kemur fram í tilkynningu frá RÚV og því bætt við að með sameiningunni sé verið að efla og bæta fréttaþjónustu RÚV í útvarpi, sjónvarpi og á vefnum. Engar uppsagnir munu standa til þrátt fyrir þetta. 

Um áttatíu manns starfa á fréttastofu RÚV eftir sameininguna - fréttamenn, dagskrárgerðarfólk, tæknimenn og aðstoðarfólk. Undir fréttastofuna heyra svæðisstöðvar og ritstjórn ruv.is. Þá færist núverandi íþróttadeild undir fréttastofuna.

„Fréttastofa Útvarpsins rekur upphaf sitt til stofnárs Ríkisútvarpsins 1930 og Fréttastofa Sjónvarpsins hóf göngu sína árið 1966. Það blasir því við að sameinuð fréttastofa RÚV byggir á gömlum og traustum grunni, mikilli reynslu og þekkingu. Fréttastofurnar hafa nú um langa hríð átt náið og gott samstarf um ýmis fagleg og rekstrarleg mál, einkum eftir flutning Sjónvarpsins í Efstaleiti 1 árið 2000. Um tíma heyrðu fréttastofurnar undir sameiginlegt fréttasvið en síðustu árin hafa þær verið reknar sem sjálfstæðar einingar," segir í tilkynningunni.

Páll Magnússon, útvarpsstjóri, segir í tilkynningu: „ Ávinningurinn af þessu er betri fagleg og rekstrarleg yfirsýn. Starfsemin verður skilvirkari og markvissari. Öllu afli hinnar sameinuðu fréttastofu verður beint í sama farveg , - að veita almenningi eins góða og trausta fréttaþjónustu og hægt er í öllum okkar miðlum: útvarpi, sjónvarpi og á vefnum. Stóran hluta daglegrar fréttavinnslu má hæglega samnýta fyrir alla miðlana. Það sem vinnst með slíkri hagræðingu má þá nýta til að auka sérhæfingu, efla fréttaskýringar og leita nýrra leiða til að miðla fréttum á þann hátt sem samtíminn krefst.

Við bindum miklar vonir við að þessi skipulagsbreyting verði til að efla íslenska fjölmiðlun. Ný Fréttastofa RÚV mun hafa á að skipa kraftmiklu, þrautreyndu og vel menntuðu starfsfólki. Það er mikilvægt að nýta sem best krafta þessa góða fólks í þágu almennings - þeirra sem treysta á fréttir RÚV".

Fréttastjóri RÚV er Óðinn Jónsson og varafréttastjórar þau Broddi Broddason, Ingólfur Bjarni Sigfússon, Margrét Marteinsdóttir og Sigríður Hagalín Björnsdóttir.

Að sögn Aðalbjörns Sigurðssonar, formanns Félags fréttamanna á RÚV, kom fram á fundi með starfsmönnum að ekki stæði til að segja upp fólki vegna breytinganna. Hann sagði að við fyrstu sýn legðust breytingarnar vel í hann. „Ég held að þetta sé gott. Þessi breyting ætti að geta aukið á sérhæfingu og það þarf ekki að tvívinna hlutina eins og stundum hefur verið hér,“ sagði Aðalbjörn.

Elín Hirst, sem fram að þessu hefur verið fréttastjóri Sjónvarps, mun hafa staðið upp á starfsmannafundi og tilkynnt að henni verði fundin önnur verkefni innanhúss.