Ágreiningur um Evrópumál að koma upp á yfirborðið

„Það sem er að koma upp á yfirborðið er sá ágreiningur sem er innan flokksins um Evrópumál. Það eru nokkrir hópar innan flokksins, hópar sem tengjast atvinnulífinu og tengjast ungliðahreyfingu fliokksins, sem vilja skoða með opnum huga mögulega inngöngu í Evrópusambandið," segir Baldur Þórhallsson, prófessor í stjórnmálafræði við Háskóla Íslands, um nýjustu tíðindi af Evrópumálum innan Sjálfstæðisflokksins.

Fram hefur komið að varaformann flokksins, Þorgerði Katrínu Gunnarsdóttur greinir á við formanninn Geir H. Haarde og dómsmálaráðherra um hvert skuli stefna. Þorgerður Katrín sagði á fundi á miðvikudag að til greina kæmi að kjósa um viðræður um Evrópusambandsaðild á næsta kjörtímabili en Geir sagði í gær að ótímabært væri að ræða málin á þessum nótum. Í svipaðan streng tók Björn Bjarnason dómsmálaráðherra í gær og sagði EES-samninginn vel duga Íslendingum.

Hefur verið tregur til að ýta undir lifandi umræðu

Aðspurður um þessar vendingar segir Baldur: „Þetta var mjög athyglisverð ræða hjá Þorgerði. Það eru náttúrlega nokkur tíðindi þegar varaformaður Sjálfstæðisflokksins segir að henni finnist að það eigi að halda þjóðaratkvæðagreiðslu um Evrópusambandsmálið þó það eigi að gera það á næsta kjörtímabii. Það er líka athyglisvert að formaður og varaformaður flokksins tala með skýrum hætti um að Sjálfstæðisflokkurinn ætli að vera leiðandi í þessari umræðu og ætli sér að skoða kosti og galla aðildar en flokkurinn hefur hingað til verið mjög tregur til þess að ýta undir nokkuð sem gæti skapað lifandi umræðu um Evrópumál," segir Baldur.

Skoðanakannanir hafa sýnt að meirihluti kjósenda flokksins vill sækja um aðild. Aðspurður hvort einhverjir þeirra séu að láta í sér heyra segir Baldur að atvinnurekendur innan flokksins séu hugsanlega að beita þrýstingi á einhverja innan flokksforystunnar um að skoða málið til hlítar.

„Einnig gæti verið að einhver innan flokksforystunnar upplifði það að þeir séu að missa tökin á Evrópuumræðunni. Það séu aðrir stjórnarmálafokkar sem stýri umræðunni og í þeirri umræðu sé búið að ýta Sjálfstæðisflokknum til hliðar. Það er mjög skiljanlegt að forysta Sjálfstæðisflokksins vilji að einhverju marki reyna að stjórna umræðunni og taka þátt í henni frekar en að vera ýtt til hliðar og láta aðra flokka um að ræða þessi mál," segir Baldur enn fremur.