Gunnar segir Lúðvík fara rangt með mál

Lúðvík Geirsson, bæjarstjóri í Hafnarfirði, segir ekki rétt frá mannaráðningum í Kópavogi, að mati starfsbróður hans í Kópavogi, Gunnars I. Birgissonar. Þetta kemur fram í tilkynningu frá Kópavogsbæ.

Fyrr í dag sagði Lúðvík í samtali við Vísi að Rósa Guðbjartsdóttir, bæjarfulltrúi Sjálfstæðisflokksins í Hafnarfirði, blanda tvennu ólíku saman í grein sem skrifaði í Fréttablaðið og fjallar um mannaráðningar í Kópavogi og Hafnarfirði.

Lúðvík sagði að í tilfellum Hafnarfjarðarbæjar hafi ekki verið að færa fólk til í algjörlega ný störf, eins og gert var í Kópavogsbæ. „Í Kópavogi voru skilgreindar nýjar stöður sem fólki var skákað til í. Í okkar tilfellum var einfaldlega verið að breyta starfsheitum og þróa störfin."

Tilkynningin í heild sinni:

Vegna ábendingar bæjarfulltrúa í bæjarstjórn Hafnarfjarðar um að ráðið hafi verið í stöður hjá Hafnarfjarðarbæ án auglýsingar líkt og í Kópavogi, hefur vefmiðillinn Vísir eftir bæjarstjóranum í Hafnarfirði að sá munur sé á, að í Kópavogi hafi verið „skilgreindar nýjar stöður sem fólki var skákað til í".

Af þessu tilefni er nauðsynlegt að árétta eftirfarandi:

Guðrún Pálsdóttir, fjármálastjóri Kópavogsbæjar, flyst í stöðu sviðsstjóra menningar- og tómstundasviðs hinn 1. september næstkomandi þegar Björn Þorsteinsson, núverandi sviðsstjóri, lýkur störfum til að rita sögu bæjarfélagsins frá 1980-2010.

Anna Birna Snæbjörnsdóttir, starfsmannastjóri Kópavogsbæjar, flyst í stöðu framkvæmdastjóra fræðslusviðs þegar sú staða losnar og Þorsteinn Einarsson snýr aftur úr námsleyfi til að gegna stöðu starfsmannastjóra.

Í hvorugu tilvikinu er um nýja stöðu að ræða.

Fyrrverandi framkvæmdastjóri fræðslusviðs, Árni Þór Hilmarsson, flyst í nýja stöðu gæðastjóra Kópavogsbæjar samkvæmt starfsskipulagsbreytingum og markmiðum um vandaða stjórnsýslu sem bæjarfélagið hefur sett sér.

Af framansögðu má ljóst vera að einungis hefur verið skilgreind ein ný staða hjá Kópavogsbæ, staða gæðastjóra. Eitt starf losnar, starf fjármálastjóra, og það hefur verið auglýst laus til umsóknar.

Framangreindur tilflutningur í starfi er í öllum tilvikum í samræmi við lög og starfsmannastefnu bæjarins.

Kópavogi, 19. ágúst 2008

Gunnar I. Birgisson, bæjarstjóri í Kópavogi