Sundlaugarhús á Akranesi skemmdist mikið vegna gufu

Miklar skemmdir urðu á sundlugarhúsi Bjarnalaugar á Akranesi í síðustu viku eftir að óprúttnir aðilar brutust þar inn.

Fram kemur í dagbók lögreglunnar á Akranesi að skrúfað hafi verið frá heitu vatni og látið renna í heita pottinn við laugina. Ekki vildi betur til en svo að sjóðandi heitt vatn rann í innilaugina sem tæmd hafði verið fyrir sumarlokun og urðu miklar skemmdir á húsinu vegna gufu.

Ekki er vitað hverjir voru að verki en þeir sem kunna að búa yfir upplýsingum um grunsamlegar mannaferðir að næturlagi dagana 16. - 19. júní eru beðnir að snúa sér til lögreglunnar á Akranesi.