Bankastjóri Nýja Glitnis með 1750 þúsund á mánuði

Stjórn Nýja Glitnis, í samráði við framkvæmdastjórn bankans, hefur samþykkt launaramma fyrir stjórnendur og starfsmenn bankans. Í því felst að mánaðarlaun bankastjóra verða 1750 þúsund krónur.

Nokkur óvissa hefur ríkt um launakjör og réttindi starfsmanna bankans síðan Nýi Glitnir var stofnaður. Nú liggur launarammi bankans endanlega fyrir og hefur sem fyrr segir verið samþykktur af stjórn bankans.

„Við í framkvæmdastjórninni höfum farið yfir þessi mál síðustu vikuna í samráði við stjórn bankans. Við töldum mikilvægt að fá ákveðin launaramma til þess að vinna með.

Markmiðið með slíkum launaramma er að geta ákveðið laun starfsmanna með tilliti til ábyrgðar, starfssviðs og sérhæfðrar þekkingar og reynslu. Nú hefjumst við handa við að byggja upp öflugan og góðan banka á nýjan leik með það að markmiði að þjónusta heimilin í landinu og koma hjólum atvinnulífsins aftur af stað," segir Birna Einarsdóttir, bankastjóri Nýja Glitnis.

Þetta kemur fram í tilkynningu frá Glitni.

Þess má geta að Finnur Sveinbjörnsson nýráðinn bankastjóri Nýja Kaupþings upplýsti í fjölmiðlum í vikunni að mánaðarlaun sín væru 1.950.000 krónur.