Segja verkföll flugumferðarstjóra aðför að ferðaþjónustu

Ferðamálasamtök Íslands segja að yfirvofandi verkföll flugumferðarstjóra, sem hefjast á föstudag, séu aðför að ferðaþjónustunni í landinu. Þá segja þau sorglegt að fámenn stétt hálaunafólks skuli ógna rekstraraðilum á Íslandi á þennan hátt.

Eins og fram hefur komið boða flugumferðarstjórar 20 fjögurra tíma vinnustöðvanir á tímabilinu 27. júní til 20. júlí til þess að knýja á um nýjan kjarasamning. Við þessu hafa fjölmargir aðilar brugðist, nú síðast Ferðamálasamtök Íslands.

Í tilkynningu frá þeim segir að á undanförnum árum hafi fjöldi frumkvöðla byggt upp margvíslega ferðaþjónustu um land allt, gistiaðstöðu, veitingasölu og fjölbreytta afþreyingu með ærnum tilkostnaði og lánum. Þessi starfsemi séu nú í uppnámi vegna verkfallsboðunar flugumferðarstjóra.

„Starfsumhverfi ferðaþjónustunnar hér á landi er afskaplega erfitt um þessar mundir. Háir vextir og almenn kaupmáttarrýrnun hefur afar slæm áhrif á starfsemina. Hækkun matarverðs veldur veitingahúsunum erfiðleikum og ógnarhátt bensínsverð dregur úr ferðalögum innanlands. Helsta von ferðaþjónustunnar var því bundinn við ferðalög útlendinga til landsins sem nú er ógnað með verkfallsboðunum flugumferðarstjóra.

Fyrirhugaðar aðgerðir flugumferðastjóra eru alvarlegar fyrir ferðaþjónustuna. Það er sorglegt að flugumferðarstjórar, fámenn stétt hálaunafólks, skuli ógna rekstraraðilum á Íslandi á þennan hátt. Ef af aðgerðum flugumferðastjóra verður hefur það bein áhrif á afkomu um tíu þúsund manns sem starfa við ferðaþjónustu á Íslandi yfir sumarmánuðina," segja Ferðamálasamtökin í tilkynningunni.