Fimm til sjö prósenta hækkanir í lágvöruverslunum í apríl

Verð á vörukörfu Alþýðusambands Íslands hækkaði um fimm til sjö prósent í lágvöruverðsverslunum á milli annarrar og fjórðu viku í apríl. Þetta kemur fram á heimasíðu ASÍ.

Verðið hækkaði mest í Bónus, eða um 7,1 prósent en í Nettó nam hækkunin 6,6 prósent. Þá hækkaði verð í Kaskó um 5,7 prósent og í Krónunni um 5,4 prósent á sama tíma. Bent er á að mun minni verðbreytingar hafi orðið hjá öðrum verslanakeðjum en þar hækkaði matarkarfan um 0,5 til eitt prósent á sama tímabili.

Þegar aðeins horft til breytinga á verði matarkörfunnar milli mælinga í þriðju og fjórðu viku aprílmánaðar kemur í ljós karfan hækkaði mest í Krónunni, eða um 4,6 prósent, en í Bónus hækkaði hún um 4,2 prósent, 3,2 prósent í Nettó en hún stóð nánast í stað í Kaskó.

ASÍ stendur fyrir verðlagseftirliti þessar vikurnar í samræmi við samkomulag við ríkissstjórnina. Vörukarfa ASÍ inniheldur allar almennar mat- og drykkjarvörur eins og t.d. brauðmeti, morgunkorn, pasta, kjöt, fisk, grænmeti, ávexti, pakkavörur, kaffi, gos, safa, auk hreinlætis- og snyrtivara. Við samsetningu vörukörfunnar voru hafðar til hliðsjónar vogir Hagstofunnar sem notaðar eru til útreiknings á vístölu neysluverðs. Vogirnar segja til um hversu stór hluti tilteknir vöruflokkar eru af neyslukörfu meðalheimilis.

Verðbreytingar eru skoðaðar í lágvöruverðsverslunum Bónus, Krónunni, Nettó og Kaskó, almennu matvöruverslununum Hagkaupum, Nóatúni og Samkaupum-Úrval og klukkubúðunum 10-11, 11-11 og Samkaupum-Strax.