Bilun í gervihnetti Basel að kenna

"Nei, þetta var ekkert stress. Maður er ýmsu vanur," sagði Pétur Guðmundsson útsendingarstjóri hjá Rúv nokkrum mínútum eftir að leik Þýskalands og Tyrklands lauk með sigri Þjóðverja. Á hápunkti leiksins datt gervihnötturinn út og milljónir áhorfenda horfðu á auðan skjá.

"Þetta var bilun út í Basel í Sviss og náði út um um alla Evrópu," segir Pétur. "Maður sá á myndum frá Brandenborgarhliðinu að þetta var alveg eins og hjá okkur."

Lýsendur leiksins lentu í stökustu vandræðum þegar merkið datt út en Þorsteinn Joð og félagar í betri stofunni beittu spásagnargáfunni þegar engin var myndin. Þorsteinn Joð sagði stemninguna líkasta kosningasjónvarpi þegar nýjustu tölur eru við það að detta inn og þegar Tyrkland jafnaði vitnaði hann í Evróvisjón keppnina.

"Tyrkland. Tólf stig."

Það voru þó Þjóðverjar sem fóru með öll stigin heim og miða í úrslitaleikinn á EM. Eftir sátu sveittir sjónvarpsmenn sem þurftu að beita öllum sínum leiklistarhæfileikum til að spinna í beinni.

En tæknimennirnir sátu svellkaldir á meðan - og höfðu trúlega gaman af.