Kjartan: Mun athuga hvort ekki megi koma upp skjólbelti strax í Nauthólsvík

Uppbygging í Nauthólsvík er í sífelldri skoðun segir Kjartan Magnússon, formaður íþrótta- og tómstundaráðs Reykjavíkur, en forstöðumaður svæðisins hefur gagnrýnt stöðnun þess. Uppbyggingin mun þó taka nokkur ár, meðal annars sökum þess að skjólgróðurbelti þarfnast tíma til að vaxa.

Óttarr Hrafnkelsson, forstöðumaður Ylstrandarinnar og Siglingaklúbbsins í Nauthólsvík, gagnrýndi fyrir stuttu seinagang Reykjavíkurborgar í uppbyggingu svæðisins og sagði hann að margt mætti betur fara. Vísaði Óttarr meðal annars til þess að fyrir stuttu var settur niður gróður við ströndina sem rétt náði nokkra sentímetra upp í loftið en átti að veita strandargestum skjól fyrir vindi. Þarf væntanlega að bíða í rúman áratug eftir því að skjólbeltið byrji að skila árangri af einhverju marki „Ég mun fara sjálfur í að skoða það hvort einhver önnur útfærsla henti betur þannig að skjólið komi strax en ekki eftir nokkur ár," svarar Kjartan.

Kjartan bendir á að brátt verði ráðist í breytingar á Siglingaklúbbnum í Siglunesi sem muni breyta ásýnd Nauthólsvíkur en hann telur að horfa verði á svæðið í stóru samhengi. „Þegar maður lítur á heildarmyndina þá er þetta frábært svæði til útivistar og mjög vinsælt. Ég held að flestir séu mjög ánægðir með svæðið en það er alveg rétt að það er ýmislegt sem má breyta og unnið er að því," útskýrir Kjartan en er ekki tilbúinn til upplýsa hversu miklu fjármagni verður varið í uppbyggingu á svæðinu eða með hvaða hætti sú uppbygging mun fara fram.