Ríflega 800 börn ættleidd á 18 árum

Ríflega 800 börn voru ættleidd hér á landi á árunum 1990-2007 samkvæmt nýrri samantekt Hagstofunnar. Á vef stofnunarinnar kemur fram að í 375 tilvikum var um að ræða stjúpættleiðingu en frumættleiðingar voru 433, þar af 124 hérlendis.

Undanfarin ár hafa langflest ættleidd börn komið frá Kína. Frá árinu 2002 hafa 105 stúlkur og þrír drengir verið ættleiddir þaðan. Fyrir þann tíma voru flest börn ættleidd frá Indlandi, þaðan komu 48 drengir og 81 stúlka á árabilinu 1990-2007. Langflest þeirra barna sem frumættleidd eru frá útlöndum eru á fyrsta og öðru aldursári.

Þegar horft er til þeirra barna sem frumættleidd eru hér á landi er aldursdreifingin allt önnur. Einungis fáir þessara einstaklinga voru á fyrsta og öðru ári en 63 prósent yfir lögaldri, það er eldri en 18 ára. Meðal stjúpættleiddra er þetta hlutfall hærra. Þá hefur meðalaldur stjúpættleiddra hækkað talsvert á undanförnum áratug og segja má að nú heyri til undantekninga að börn undir 12 ára aldri séu stjúpættleidd. Hér á landi eru konur mun fleiri en karlar í hópi stjúpættleiddra.