Fáir fá nýtt MS-lyf

Aðeins tuttugu og fimm af þeim 85 sjúklingum sem læknar hafa metið að þurfi á nýju MS lyfi að halda, hafa fengið lyfið frá áramótum.

Yfirvöld ákváðu að gefa fimmtíu sjúklingum lyfið og segir sérfræðingur í stjórnsýslufræðum að ríkið hafi með þessum seinagangi sparað 80 milljónir króna.

Jakobína Ólafsdóttir kand.mag í stjórnsýslufræðum með áherslu á lýðheilsu og félags og heilsufræði gagnrýnir framgöngu heilbrigðisyfirvalda varðandi nýtt lyf fyrir MS sjúklinga harðlega í grein í Morgunblaðinu í dag.

Í dag eru um 340 einstaklingar sem greinst hafa með MS á Íslandi. Af þeim hafa læknar metið að 85 hafi mikið gagn af Tysabri, nýju lyfi sem hefur hamlandi áhrif á sjúkdóminn. Þrátt fyrir þetta ákváðu heilbrigðisyfirvöld að veita aðeins 50 sjúklingum aðgang að lyfinu frá og með síðustu áramótum. Jakobína vekur athygli á því að aðeins helmingur þessara fimtíu sjúklinga hafi fengið lyfið og því bíða 55 einstaklingar í algerri óvissu um hvort og þá hvenær þeir fái lyfið. En það er talið mun betra en eldi lyf og dregur úr köstum sem valdið geta sjúklingum varanlegum skaða.

Jakobína spyr í grein sinni í Morgunblaðinu hvort aðrir hagsmunir en heilsa sjúklinga eigi að ráða meðferð við sjúkdómum? Hún spyr einnig hvort standi til að setja kvóta á meðferð við öðrum alvarlegum sjúkdómum og hvort ákvarðanataka sem mismuni MS sjúklingum standist jafnræðisreglu stjórnsýslulaga?

Þá dregur hún í efa að ákvörðun sem hafi íþyngjandi áhrif á á heilsufar MS sjúklinga standist meðalhófsreglu stjórnsýslulaga. Jakbína segir að talið sé að það kosti 100 milljónir króna á ári að veita fimmtíu einstaklingum nýja lyfið. Á þeim forsendum hafi ríkissjóður sparað 80 milljónir með því að draga lyfjagjöfina við flesta þá sem bíða eftir lyfinu og gefa það einungis 25 sjúklingum. Þetta sé lægri fjárhæð en Landsspítalinn greiði birgjum í vanskilavexti á sama tíma og ríkissjóður sé rekinn með tekjuafgangi.