Vilhjálmur og Ólafur F. sammála um ráðningu Jakobs

Ólafur F. Magnússon borgarstjóri ráðfærði sig við Vilhjálm Þ. Vilhjálmsson, oddvita Sjálfstæðismanna, áður en hann réð Jakob Frímann Magnússon sem framhandlegg sinn. Þetta staðfesti Vilhjálmur við Vísi í dag.

"Ég og Ólafur ræddum þessa ráðningu áður en hún var tilkynnt og ég get sagt það að ég er mjög sáttur við hana. Ég tel Jakob Frímann vera öflugan mann sem á eftir að láta til sín taka í borginni," segir Vilhjálmur.

Aðspurður um laun Jakobs sagðist Vilhjálmur alveg geta skilið það að sumum finnst þau há. "Það er misjafnt hvað fólki finnst. Ég bendi hins vegar á að einstaklingur í sömu stöðu í tíð R-listans var með sömu laun og Jakob fær. Það hlýtur að segja eitthvað," segir Vilhjálmur.

Ólíkt forvera sínum sem heyrði undir skrifstofu borgarstjóra heyrir Jakob Frímann beint undir borgarstjóra. Vilhjálmur segir ekkert óeðlilegt við það. "Eigum við ekki bara að vera ánægð með að borgarstjórinn vilji vera í svo nánum tengslum við þann mann sem mun bera hitann og þungann af endurreisn miðborgarinnar næsta árið," segir Vilhjálmur.

Ráðning Jakobs Frímanns er tímabundin til eins árs og Vilhjálmur sagðist ekki svarað því hvað yrði um Stuðmanninn þegar hann tæki við sem borgarstjóri eftir tæpt ár. "Eitt ár er langur tími og það verður skoðað þegar að því kemur."