BUGL stækkar

Ný göngudeildarbygging við Barna- og unglingageðdeild Landspítalans, sem oft er kölluð BUGL, verður vígð næst komandi þriðjudag. Daginn eftir gefst almenningi kostur á skoða húsnæðið á milli klukkan 14 og 16.

Fram kemur í tilkynningu að nýja göngudeildarhúsnæðið mun stórbæta aðstæður skjólstæðinga og starfsfólks BUGL. Viðbyggingin er 1244 fermetrar, tvær hæðir og jarðhæð. Byggingin er tengd núverandi húsnæði deildarinnar með glerjuðum tengigangi.

,,Margar hendur hafa lagst á eitt við uppbyggingu nýs húsnæðis og hefur Kvenfélagið Hringurinn gefið 50 milljónir króna. Auk þess hafa margir aðrir lagt verkefninu lið með drjúgu framlagi, Thorvaldsenskonur, Kiwanismenn, Lionsmenn, kvenfélagasamtök og mörg önnur félagasamtök, fyrirtæki og einstaklingar," segir í tilkynningu.

Barna- og unglingageðdeild Landspítalans tók til starfa árið 1970. Þar er tekið á móti börnum upp að 18 ára aldri. Starfsemin hefur aukist ár frá ári og í dag starfa rúmlega 100 starfsmenn við BUGL. Komur á göngudeild hafa numið allt að 7000 heimsóknum á ári.