Ákærður fyrir að stela Merrild-kaffi úr vinnuskúr

Við Héraðsdóm Reykjaness var í dag þingfest ákæra á hendur tæplega sextugum karlmanni.

Er honum gefið að sök að hafa brotist inn í vinnuskúr á höfuðborgarsvæðinu um miðja nótt í september síðastliðnum og stolið þaðan ýmsum varningi. Meðal þess sem hann hafði á brott með sér var örbylgjuofn, tvær borvélar, hjólsög og fimm Merrild-kaffipokar.

Að auki er ákært fyrir þjófnað á tveimur pelum af vodka úr verslun ÁTVR í verslunarmiðstöðinni Firðinum í Hafnarfirði í mars. Brotin teljast varða við 244. grein almennra hegningarlaga þar sem fjallað er um þjófnað á fjármunum eða orkuforða.