Anarkistar lýsa fánaskiptunum á hendur sér

Íslenskir anarkistar hafa lýst yfir ábyrgð á því að þjóðfáninn var klipptur niður af flaggstöng á byggingu stjórnarráðsins og byltingarfáni Jörundar hundadagakonungs hengdur þar með honum. Vísir birti myndir af atburðunum fyrir skömmu.

Tölvupóstur frá anarkistum barst fréttastofunni skömmu eftir atvikið og í kjölfarið fékk blaðamaður Vísis að taka símaviðtal við einn þeirra aðila er komu að fánaskiptunum. „Það sem Jörundur gerði var að reyna að dreifa valdinu til fólksins og það er það sem við viljum. Við viljum að fólk stjórni lífi sínu sjálft og skipuleggi samfélagið sjálft. Þetta var bara lítil byrjun," sagði þessi aðili sem kaus að koma fram nafnlaust.

Tölvupósturinn sem fréttastofunni barst er birtur í heild sinni hér að neðan:

„Rétt í þessu var byltingarfáni Jörundar Hundadagakonungs strengdur á fánastöng á

þaki stjórnarráðsins. Þar flöktir hann ásamt íslenska fánanum sem án efa hefur vanhelgast

við þessa meðferð. Þrír flatir þorskar blaka yfir íslenskum stjórnvöldum.

Þó Jörundur hafi ekki verið algjör anarkisti, heldur krýnt sig sem valdhafa Íslands, var

tilræði hans eina almennilega tilraunin til að koma af stéttaskiptingu og misrétti á

Íslandi. Við leggjum engar sérstakar mætur á Jörund, frekar en nokkurn annan valdhafa,

en metum tilraunir hans til að færa valdið frá toppi píramídanns til almennings. Fyrir

það virðum við hann og höldum uppi hans heiðri, sem og allra þeirra sem berjast gegn

ójöfnuði, valdníðslu og óréttlæti.

Svo sat löggu-krían upp á þaki, horfði á fánana og vissi ekki hvað hún átti að gera...

Að lokum vitnum við í Helga Hóseason: „Hví að hafa kristlafstusku yfir vorum hausum?"

Byltingarkoss frá anarkistum!"