Lausamunir fjúka í óveðri

Óveður hefur gengið yfir landið í nótt og í morgun og hafa Björgunarsveitir Slysavarnafélagsins þurft að sinna nokkrum beiðnum í morgun vegna þess.

„Útköllin hafa gengið ágætlega, við áttum von á fleiri útköllum þar sem fólk er enn með lausamuni úti eftir sumarið sem fara að fjúka í svona veðri," segir Ólöf Snæhólm Baldursdóttir upplýsingafulltrúi Slysavarnafélagsins Landsbjargar.

Að sögn Ólafar hafa um 20 manns verið að störfum auk björgunarsveitarinnar Héraðs og Sveinungs sem eru á leið í Stóru urð í Dyrfjöllum til að sækja tvo franska göngumenn sem eru í vandræðum vegna veðurs. Ekki er vitað til þess að neitt ami að þeim og eru þeir í símasambandi en þó líklegast úti að glíma við óveðrið að sögn Ólafar.

Meðal þeirra beiðna sem borist hafa björgunarsveitamönnum er hjálp við að laga þak sem losnaði af húsi í Gnoðavogi og klæðningu sem losnaði af fjölbýlishúsi í Grafarholti. Síðan hafa trampólín fokið í görðum.