Tóm tjara að fjármálaóreiða hafi einkennt stjórnartíð Ólafs Ragnars

Einar Karl Haraldsson, aðstoðarmaður iðnaðarráðherra, var á sínum tíma framkvæmdastjóri Alþýðubandalagsins þegar Ólafur Ragnar Grímsson var þar formaður. Hann segir af og frá að fjármálaóreiða hafi einkennt stjórnartíð Ólafs eins og kemur fram í dagbók Matthíasar Johannessen, fyrrverandi ritstjóra Morgunblaðsins.

Matthías rekur samtal sem hann átti við Svavar Gestsson árið 1998 þar sem fram kom að Ólafur væri með kreditkort frá flokknum sem hann „notaði óspart" auk þess sem skuldir flokksins hafi verið rúmar 50 milljónir þegar Margrét Frímannsdóttir tók við af Ólafi.

Einar segir að eins og í öðrum flokkum og félagsmálahreyfingum á þessum tíma hafi verið lausatök í bókhaldinu og að sem betur fer hafi verið gerð bragarbót á því síðustu árin. „En ég fullyrði að á engum tímapunkti var nokkuð í fjármálum Alþýðubandalagsins meðan ég fékkst við þau sem mætti telja óviðurkvæmileg á nokkurn hátt."

Einar segir að bókhaldið hafi verið ófullkomið og þar hafi verið að finna gamlar skekkjur sem rekja mátti til ákvarðana framkvæmdastjórnar á hverjum tíma. „En það er bara tóm tjara að einhver fjármálaóreiða hafi einkennt stjórnartíð Ólafs Ragnars. En þetta mál sýnir kannski illindin sem voru í þessum flokki á þessum árum og nauðsyn þess að leggja hann niður," segir Einar Karl, sem var framkvæmdastjóri flokksins í formannsstíð Ólafs Ragnars árin 1993 til 1996. Hann segist ekki kannast við að Ólafur hafi verið með kreditkort frá flokknum eins og Styrmir hefur eftir Svavari.

„Aldrei hefði mér nú dottið í hug að tala við Matthías Johannesson um fjármál Alþýðubandalagsins og met ég hann þó mikils," segir Einar Karl að lokum.