Innbrot, eldur og fullar fangageymslur

Lögreglan á höfuðborgarsvæðinu leitar nú innbrotsþjófa sem brutust inn á að minnsta kosti þremur stöðum í nótt og stálu verðmætum. Þeir brutust inn i Bónusvídeó við Lækjargötu í Hafnarfirði, Hlöllabáta í Kópavogi og KFC kjúklingastað í Bæjrlind í Kópavogi. Lögreglu grunar að um sömu menn sé að ræða í öllum tilvikum, og er lögreglan meðal annars að skoða upptökur úr eftirlitsmyndavélum á stöðunum. Þá hefur hún stöðvað fjölda bíla, sem voru á ferðinni í nótt, en án árangurs, enn sem komið er.

Lögreglan á Akureyri hengdi gula spjaldið á um það bil fjörutíu bíla í bænum í nótt, þar sem þeim hafði verið ólöglega lagt. Einkum voru það bílar sem lagt hafði verið þannig að þeir myndu trufla gangandi umferð í morugnsárið. Eigendur bílanna voru ekki sektaðir, en fylgst verður með því að þeir taki mark á gula spjaldinu, því næst verður það rauða spjaldið, með tilheyrandi sektum.

Eldur kviknaði í mannlausum bíl við Arnarbakka í Breiðholti í nótt og stóð hann í björtu báli þegar slökkvilið kom á vettvang. Eldurinn var að teygja sig í nálægan bíl, en slökkviliðinu tókst að koma í veg fyrir að eldurinn læsti sig í hann, en hann sviðnaði þó eitthvað. Eldsupptök eru ókunn og útilokar lögregla ekki að kveikt hafi verið í bílnum.

Fangageymslur lögreglunnar á höfuðborgarsvæðinu fylltust í nótt, sem er fátítt í miðri viku. Bæði gistu þar menn, sem voru teknir úr umferð vegna ölvunar, og svo nokkrir sem voru handteknir í gævköldi vegna rannsóknar á afbrotamálum.