Fyrsti hauststormurinn á leiðinni

Búist er við miklum stormi víða um land, þó einkum sunnan- og vestanlands, í nótt og fram eftir morgni. Þorsteinn V. Jónsson, veðurfræðingur hjá Veðurstofu Íslands, segir að fyrsta alvöru haustrokið komi yfirleitt flestum í opna skjöldu og því verði fólk að vera vart um sig.

Þorsteinn nefnir sem dæmi að loka verði öllum gluggum og að passa þurfi allt lauslegt utan dyra, s.s. trompólín og tjaldvagna. Eins verði að gæta vel að niðurföllum.

Stormurinn ætti að ná hámarki milli klukkan fjögur og sex á suð-vesturhorninu og því ættu verstu hviðurnar að vera liðnar hjá þegar fólk byrjar að streyma til vinnu á höfuðborgarsvæðinu um klukkan átta. Þó er búist við mjög mikilli rigningu allan daginn. Norð-Austurlandið ætti að sleppa best frá storminum en þó verður hvasst við ströndina.

Nokkur strekkingur og vætusamt verður síðan á laugardaginn, allavega vestan til, en veðrið ætti að vera að mestu gengið yfir á sunnudaginn.