Vaxtahækkun leiði til fjölda gjaldþrota hjá heimilum og fyrirtækjum

Guðni Ágústsson, formaður Framsóknarflokksins, sagði í umræðum um stöðu efnahagsmála og samkomulag við Alþjóðagjaldeyrissjóðinn að hann teldi að vaxtahækkun Seðlabankans í vikunni myndi leiða til fjölda gjaldþrota hjá heimilum og fyrirtækjum.

Sú ákvörðun að hækka vexti til þess að halda í fjármuni í landinu myndi ekki skila árangri því Ísland væri um þessar mundir ekki í miklum metum hjá fjárfestum. Hann sagði framsóknarmenn hafa stutt þá ákvörðun að leita til Alþjóðagjaldeyrissjóðsins þannig að hægt yrði að opna dyr fyrir Íslendinga á ný. Þeir óttuðust nú að hið gamla bragð sjóðsins að hækka vexti bæri ekki árangur og af þessari ákvörðun um vaxtahækkun hefði hann meiri áhyggjur en nokkru öðru.

Sagði Guðni megnið af ríkisstjórninni hafa farið úr landi og síðan hefði hækkun stýrivaxta skollið á og sagði hann sorglegt að margir ráðherrar hefðu verið staðnir að því að segja ósatt um málið. Nefndi hann Össur Skarphéðinsson iðnaðarráðherra þar til sögunnar og benti á að vaxtaákvörðunin hefði komið í kjölfar samnings Alþjóðagjaldeyrissjóðsins við ríkisstjórnina.

Þakkaði Ingibjörgu fyrir harða sókn gegn Bretum

Guðni þakkaði Ingibjörgu Sólrúnu Gísladóttur utanríkisráðherra fyrir harða vörn og harða sókn gegn flokksbræðrum sínum í Bretlandi. Því miður hefði Geir H. Haarde forsætisráðherra aðeins sagst ekki myndu munnhöggvast við Gordon Brown, forsætisráðherra Bretlands, eftir að hann hefði ráðist gegn Íslendingum.

Írekaði Guðni að kæra ætti Breta fyrri aðgerðir sínar gagnvart Íslendingum en þær hefðu lokað öllum dyrum að íslenskri þjóð. Menn hefðu verið hugsi þegar þessi valdamikla þjóð hefði lýst Ísland gjaldþrota og sagt að viðureignin væri við óbótamenn og hálfgerða hryðjuverkamenn. Við ættum nú kröfur á hendur breskum stjórnvöldum fyrir að hafa gert kreppuna hér miklu alvarlegri en hún hefði orðið. Þeir hefðu fellt Kaupþing í Bretlandi og þar með móðurfélagið hér heima.

Guðni sagði framsóknarmenn telja mikilvægt að ráðast í hvítbók sannleikans. Margir hefðu brugðist og mikivægast væri að fá óháðan erlendan aðila til þess að rannsaka mál hér.

Formaður Framsóknarflokksins sagði enn fremur að það væri ekkert mikivægara nú en að ganga bjartsýnn fram á veginn. Það gerði íslenska þjóðin með samstöðu. Ríkisstjórnin þyrfti enn fremur að lýsa því hvernig hún myndi taka utan um heimilin og það væri mikivægt að vinna hratt og vel og setja gleðina í gang. „Við eigum bjarta framtíð, Íslendingar," sagði Guðni.