Ríkisstjórn 120 - þingmenn 2

Af 145 stjórnarfrumvörpum sem lögð hafa verið á yfirstandandi þingi hafa 120 orðið að lögum en einungis tvö af 74 þingmannafrumvörpum hafa verið samþykkt. Þetta kom fram í máli Katrínar Jakobsdóttur, varaformanns Vinstri - grænna, á Alþingi í dag þar sem hún vakti athygli á veikri stöðu þingsins.

Enn fremur kom fram í máli Katrínar að af af 78 þingsályktunartillögum þingmanna hefðu 8 verið samþykktar. Spurði hún forseta Alþingis, Sturlu Böðvarsson, hvernig hann sæi störf þingsins þróast í ljósi þess að mörg þingmannamál döguðu upp í nefndum. Spurði Katrín enn fremur hvernig hann hygðist beita sér í málinu og hvort þessi þróun væri æskileg.

Sturla Böðvarsson svarað því til að mörg þingmannamál hefðu fengið umræðu í þingsal og farið til nefndar en önnur ekki. „Þetta er nú eins og oft hefur viljað verða," sagði Sturla og bætti við að hann tæki þessar ábendingar til skoðunar. Það væri í höndum þingnefnda hvað mál væru tekin fyrir en hann teldi það ekki óeðlilegt að það gætu orðið breytingar í framtíðinni þannig að þingmannamál hlytu meiri umræðu og yrðu afgreidd.

Undrunarefni hve afdrif þingmannamála eru

Árni Þór Sigurðsson, flokksbróðir Katrínar, sagðist telja mjög brýnt að forseti Alþingis beitti sér fyrir því að þingmannamál fengju betri og meiri umfjöllun. Það væri mörgum nýjum þingmönnum undrunarefni hver afdrif þingmannamála væru og það væri ekki bara á valdi þingnefnda hvaða mál væru tekin fyrir. Það hafi fengist svör frá nefndarformönnum að mál yrðu ekki afgreidd án þess að afstaða væri tekin til þess hvers eðlis frumvörpin væru. Það þyrfti átak til að laga þessi mál.

Fleiri þingmenn stjórnarandstöðunnar tóku undir orð Katrínar og Árna Páls. Þannig sagði Guðni Ágústsson, formaður Framsóknarflokksins, að að stoðirnar þrjár, Alþingi, ríkisstjórn og dómstólar, þyrftu að búa við jafnræði en Alþingi væri veik stofnun núna. Þingmenn ættu að geta notið afl síns og virðingar hvort sem þeir væru í stjórnarliðar eða stjórnarandstæðingar. Ríkisstjórnir hefðu ráðið of miklu á Alþingi síðustu áratugi.

Alþingi beri meiri virðingu fyrir sjálfu sér

Jón Magnússon, þingmaður Frjálslynda flokksins, sagði önnur mál en þau sem væru þóknanleg ríkisstjórn ekki fást afgreidd. Það skipti miklu máli að Alþingi bæri meiri virðingu fyrir sjálfu sér en það væri ekki mikil virðing yfir því þegar stjórnarfrumvörp rynnu í gegn en þingmannamál döguðu uppi eða yrðu jafnvel ekki rædd. Hann teldi eðlilegt að mál yrðu tekin fyrir í ákveðinni röð.

Stjórnarliðinn Pétur Blöndal tók í sama streng og sagðist margoft hafa bent á að styrkja þyrfti Alþingi og huga betur að þrískiptingu valdsins. Vildi hann að ráðuneyti og hópar sneru sér til þingnefnda með mál sem þingnefndir gætu svo lagt mat á og ákveðið hvort smíða ætti lög í kringum.