Samkomulag um afnot af kirkjum

Þjóðkirkjan og Kaþólska kirkjan á Íslandi hafa gert samkomulag um afnot af kirkjum og um helgihald. Biskup Íslands, Karl Sigurbjörnsson og Reykjavíkurbiskup, Pétur Bürcher, undirrituðu samkomulagið fyrir helgi en það felur í sér leiðbeiningar um samstarf kirkjudeildanna.

Í leiðbeiningunum kemur fram að hafa skuli samband með fyrirvara við sóknarprest eða þann sem hann hefur veitt umboð til útláns. Fjallað er um umbúnað og þóknun vegna ræstinga og kirkjuvörslu. Þá er hvatt til sameiginlegs helgihalds með bænastundum, lofgjörðar- og prédikunarguðsþjónustum í samstarfi presta og safnaða.

Fram kemur í fréttatilkynningu frá Þjóðkirkjunni að altarissakramentið sé ekki haft um hönd við slíkt helgihald, af tillitsemi við mismunandi guðfræðilegan skilning kirknanna á máltíð Drottins.