Nýtt meistaranám við Háskólasetur Vestfjarða

Menntamálaráðherra mun í dag formlega setja nýja námsleið á meistarastigi við Háskólasetur Vestfjarða. Um tímamót er að ræða því þetta er í fyrsta sinn sem staðbundið háskólanám er alfarið er kennt á Vestfjörðum.

„Með setningu meistaranámsins í haf- og strandsvæðastjórnun stígur Háskólasetur Vestfjarða stórt skref í átt að þeim markmiðum sem sett voru fram í framtíðarsýn setursins í október á síðasta ári. Þau markmið fela meðal annars í sér að Háskólasetrið bjóði upp á hágæða alþjóðlegar námsleiðir á meistarastigi á fjölbreyttum sviðum sem öll tengjast málefnum hafs og strandsvæða", segir í tilkynningu.

Meistaranámið í haf- og strandsvæðastjórnun er þverfaglegt, alþjóðlegt nám á sviði umhverfis- og auðlindastjórnun með áherslu á haf- og strandsvæði, en sérhæft nám sem snýr að þessum mikilvægu svæðum hefur ekki verið í boði á Íslandi fyrr. Námið er sett á fót í samvinnu við Háskólann á Akureyri sem hefur umsjón með innritun og útskrift nemenda jafnframt því að vera fræðilegur bakhjarl námsins.

Málþing um sjálfbæra nýtingu strandsvæða

Setningarathöfnin fer fram í Edinborgarhúsinu á Ísafirði kl. 16, en í tengslum við hana verður einnig blásið til málþings um sjálfbæra nýtingu íslenskra strandsvæða kl. 13 sem Einar K. Guðfinnsson sjávarútvegs- og landbúnaðarráðherra mun setja. Málþinginu verður svo framhaldið mánudaginn 1. september og stendur frá kl. 8.30-12.30.

Á málþinginu munu innlendir og erlendir kennarar námsleiðarinnar, ásamt fleiri sérfræðingum, varpa ljósi á viðfangsefni haf- og strandsvæðastjórnunar. Meðal efnis á málþinginu eru rannsóknir á náttúru og nýtingu strandsvæða, skipulag á strandsvæðum og stjórnun þeirra.

Bæjarins besta greindi frá.