Sögulegar sættir

Guðjón Friðriksson sagnfræðingur og Matthías Johannessen fyrrverandi ritstjóri Morgunblaðsins hafa náð sáttum vegna þess sem Guðjón kallaði ærumeiðandi lygaþvælu í dagbókum Matthíasar á netinu.

Dagbækur Matthíasar eru á netinu og eins og við sögðum frá fyrir helgi stendur í færslu frá október 98 að ung stúlka hafi fengið ranga einkunnagjöf hjá Guðjóni fyrir ritgerð um verk Matthíasar. Matthías ýjar að því í færslunni að ástæðan fyrir falleinkunn stúlkunnar hafi verið sú að Guðjóni hafi verið bullandi kommúnisti. Í kjölfarið hafi Guðjóni verið sagt upp og hrökklast síðan til Ísafjarðar.

Guðjón hafnaði þessari sögu með öllu í grein í Morgunblaðinu í vikunni og kvaðst aldrei hafa kennt stúlkunni, aldrei hafa kennt í Ármúlaskóla, aldrei svo hann muni fengið ritgerð um ljóð Matthíasar og aldrei verið sagt upp störfum við neinn skóla. Þá lýsti Guðjón því yfir í samtali við fréttastofu að hann færi lengra með málið ef Matthías tæki færsluna ekki út af netinu. En nú hafa þeir Guðjón og Matthías náð sáttum.