Skemmti öskrandi Kínverjum

Hljómsveitin Hellvar er nýkomin frá Kína þar sem hún spilaði á þrennum tónleikum. „Ég hef bara aldrei upplifað annað eins," segir Heiða Eiríksdóttir, söngkona Hellvars, um viðtökur Kínverja á tónleikum sveitarinnar.

„Það voru bara allir að missa sig. Sverrir bassaleikari sagði eftir fyrsta lagið að nú skildi hann hvernig Bítlunum leið því það var svo mikið öskrað að við heyrðum varla í sjálfum okkur."

Heiða er með skýringu á látunum. „Ég held að fólkið hafi hreinlega skilið gamla leiðinlega lífið sitt eftir og alveg sleppt sér á tónleikunum. Þarna eru margir sem vinna langan vinnudag í ömurlegri vinnu og fá kannski ekki nema þrjá frídaga á mánuði. Fólkið fór því bara í eitthvert ástand. Öskraði og gólaði og dansaði einhverja furðulega hringdansa."

Það var duglegur Íslendingur, Ásgeir Tómasson, sem kom tónleikunum í kring og auk Hellvars spilaði keflvíska hljómsveitin Vicky Pollard. Upphaflega stóð til að spila á útitónleikum. „Kínversk stjórnvöld settu bara ný lög þrem dögum áður en við fórum út sem banna að fleiri en hundrað manns safnist saman á einum stað úti við. Því varð að færa alla tónleikana í hús. Þessu verður víst breytt aftur eftir Ólympíuleikana."

Tónleikarnir voru í Peking sem Heiða segir stórkostlega borg. „Það eru hermenn með byssur úti um allt en þegar maður hefur vanist því finnst manni borgin bara afslöppuð. Meira að segja úti í súpermarkaði eru herlögreglumenn með alvæpni sem hjálpa manni að raða ofan í poka. Mjög sérstakt!"

Þetta er hugsanlega bara fyrsta skrefið í Kínaævintýrum Hellvars því sveitin er bókuð aftur í Kína í október. „Nú förum við að safna fyrir flugmiðunum," segir Heiða.