Forseti borgarstjórnar verið með bílstjóra í áratugi

Það er ekki nýtilkomið að forseti borgarstjórnar skuli hafa aðgang að bifreið og bílstjóra, að sögn skrifstofustjóra borgarstjórnar. Nokkur umræða hefur spunnist um einkabílstjóra borgarstjórnar undanfarið en Ólafur Kr. Hjörleifsson, skrifstofustjóri borgarstjórnar segir að þetta fyrirkomulag hafi tíðkast í fjöldamörg ár eða áratugi.

„Það eru fjöldamörg ár síðan þetta var tekið upp. Forseti borgarstjórnar hefur aðgang að bíl og bílstjóra eins og tekið er fram í samþykkt um kjör og starfsaðstöðu borgarfulltrúa. Bílstjórinn er þó ekki eingöngu að sinna forsetanum heldur er hann í öðrum störfum í húsinu," segir Ólafur. Hann segist ekki hafa það á hreinu hvenær nákvæmlega þessu fyrirkomulagi var komið á en segir að um sé að ræða áratugi en ekki ár í því sambandi.