Lögguhrotti fær hálfs árs fangelsisdóm

Ágúst Fylkisson var í morgun dæmdur í sex mánaða fangelsi, þar af fjóra skilorðsbundna, fyrir alvarlega líkamsárás á lögregluþjón eftir mótmæli vörubílstjóra í vor.

Samkvæmt ákæru réðst Ágúst á lögregluþjóninn á Kirkjusandi í apríl þar sem verið var að afhenda vörubíla sem haldlagðir höfðu verið í mótmælunum. Sló hann lögreglumanninn í andlitið og tók hann hálstaki þannig að lögregluþjónninn náði vart andanum. Sleppti hann ekki takinu fyrr en lögreglumenn komu félaga sínum til aðstoðar. Við þetta fékk lögreglumaðurinn sem ráðist var á blóðnasir, mar og bólgur í andliti og áverka á hálsi.

Málið á hendur Ágústi var þingfest í Héraðsdómi Reykjavíkur í morgun og játaði hann á sig verknaðinn. Dómur var svo kveðinn upp í kjölfarið. Auk brots gegn valdstjórninni var Ágúst sakfelldur fyrir vopnalagabrot með því að hafa í fórum sínum lögreglukylfu úr tré en í samtali við fjölmiðla eftir málið sagðist Ágúst hafa ráðist á lögreglumanninn vegna þess að lögregla tók af honum kylfuna. Ágúst baðst skömmu eftir atvikið afsökunar á framferði sínu, meðal annars í samtali við Vísi.

Dómurinn er í samræmi við það sem saksóknari fór fram á en Ágúst hefur nú fjórar vikur til þess að ákveða hvort hann áfrýjar málinu til Hæstaréttar.