Óskar eftir að samningi við borgina verði rift

Gunnar Smári Egilsson hefur óskað eftir því að samningi hans við Reykjavíkurborg, sem gerður var í borgarstjóratíð Ólafs F. Magnússonar, verði rift.

Ólafur F. Magnússon, fyrrverandi borgarstjóri, réð Gunnar Smára til að gera heildarúttekt á upplýsingamálum Reykjavíkurborgar. Ólafur hefur sagt að upphaflega hafi Gunnar Smári átt að starfa sem aðstoðarmaður borgarstjóra en ráðning hans reyndist umdeild og því var honum falið þetta verkefni.

Haft var eftir Gunnari Smára í viðtali á Vísi skömmu eftir að nýr meirihluti komst til valda að það væri einlægur vilji þeirra sem væru að taka við í ráðhúsinu að hann kláraði verkefni sín enda væru þau brýn. Gunnar Smári samdi um að fá 1200 þúsund krónur greiddar fyrir vinnu sína en hefur nú fallið frá þeirri kröfu.