Fjöldauppsagnir yfirvofandi

Von er á fjöldauppsögnum í byggingariðnaði á næstu mánuðum ef fjármagn kemur ekki fljótlega inn á fasteignamarkaðinn. Þetta segir Árni Jóhannsson forstöðumaður mannvirkjasviðs hjá Samtökum Iðnaðarins.

Árni segir ástandið í iðnaðinum ekki hafa verið verra síðan á árunum 1993- 1995.

Verkefnastaða margra byggingarfyrirtæka er slæm og ef það breytist ekki fljótt þurfa þau að fækka starfsfólki. Í fyrra unnu 17000 manns við mannvirkjagerð á Íslandi og því þarf ekki miklar sveiflur til þess að fleiri hundruðir manna missi vinnuna þegar samdrátturinn byrjar að hafa áhrif á verktaka.

"Vöxtur og viðgangur þessarar atvinnugreinar er því ekkert einkamál þeirra sem þar starfa," segir Árni. Hann segist ekki gera sér grein fyrir hvenær þessar uppsagnir verða eða hve margir missu vinnuna.

"En næsta haust verður mjög erfitt," bætir hann við.

Árni segir að fjármagn vanti inn á markaðinn til að hressa hann við. Árið 1995 var stækkun á álverinu í Straumsvík það "kikkstart" sem til þurfti að sögn Árna vonast hann til að svipaðra áhrifa sé að vænta af framkvæmdum í Helguvík.