Telur fáránlegt að halda í húsin að Laugavegi 4 og 6

Svava Johansen, verslunarrekandi á Laugaveginum, telur það fáránlegt ef halda eigi húsunum að Laugavegi 4 og 6 og segir það mikla afturför ef af verði. Hún segist hlynnt því að vernda hús í miðbænum en það verði að gera á þeim stöðum það sem það henti.

Fram hefur komið í fréttum að Húsafriðunarnefnd hyggist leggja það til við menntamálaráðherra að húsin að Laugavegi 4 og 6 verði friðuð. Vísar nefndin meðal annars til þess að flutningur húsanna rýri götumyndina.

Til stóð að rífa húsin en eigendur lóðarinnar, eignarhaldsfélagið Kaupangur, samþykktu að veita borginnni tveggja vikna frest til að flytja húsin burt. Það var áður en Húsafriðunarnefnd gaf út að hún vildi friða húsin. Eigendurnir, sem hyggjast reisa hótel á reitnum, segja að með því geti skapast skaðabótaábyrgð sem almenningur geti þurft að greiða úr sínum vasa.

Í samtali við Vísi segir Svava Johansen, forstjóri NTC, sem rekur meðal annars verlsunina Sautján á Laugaveginum, alveg fáránlegt að hafa húsin áfram á sínum stað og bendir á að verið sé að byggja upp verslunargötu í miðbænum. „Mér finnst sjálfsagt að vernda og endurgera hús á þeim stöðum þar sem það hentar og þar sem þau falla vel inn í heildina en ef miðbærinn á að vera samkeppnishæfur verða svona hús að fara," segir Svava og bendir á að húsin séu lítil og því rúmist engin alvöru starfsemi í þeim. Henni finnist í góðu lagi ef húsin verði flutt og þeim komið fyrir í Hljómskálagarðinum eða á Árbæjarsafninu.

Svava bendir á að uppbygging gamalla húsa í miðborginni hafi tekist vel á sumum stöðum, til að mynda í Aðalstræti og það sé gaman sjá. Aðspurð hvort hún telji að meirihluti verslunarrekenda við Laugaveg deili skoðun hennar á því að húsin beri að fjarlægja segist Svava telja svo vera. „Þeir sem ætla að halda áfram verslunarrekstri næstu árin eru á þessari skoðun og þar í hópi eru bæði fagurkerar og rekstrarmenn," segir Svava.