Nauðgaði fósturdótturinni tvisvar til þrisvar í viku í þrjú ár

Líkt og Vísir greindi frá í gærkvöldi var karlmaður um fertugt dæmdur í átta ára fangelsi í Héraðsdómi Suðurlands í gær fyrir að misnota fósturdóttur sína. Í dómnum kemur m.a fram að maðurinn hafði samræði við stúlkuna tvisvar til þrisvar sinnum í viku frá því hún var ellefu ára þar til hún var fjórtán ára gömul. Maðurinn neitaði sök allan tímann. Lögmaður mannsins býst fastlega við að dómnum verði áfrýjað til Hæstaréttar.

Lögreglu barst ábending fyrir um ári síðan og í kjölfarið hófst rannsókn á málinu. Auk fangelsisdómsins var manninum gert að greiða þrjár milljónir í skaðabætur og málskostnað upp á rúmar 1500 þúsund krónur.

Manninum var einnig gefið að sök að hafa frá árinu 1998, þegar stúlkan var fimm ára gömul og fram til ársins 2004, í tugi skipta á heimili þeirra káfað á brjóstum telpunnar og kysst hana, meðal annars á brjóstin. Þá var honum einnig gefið að sök að hafa frá árinu 2004 til októbermánaðar 2007, tvisvar til þrisvar sinnum í viku, haft samræði við stúlkuna, sem þá var ellefu til fjórtán ára gömul eins og fyrr segir.

Kynferðismökin áttu sér oftast stað í svefnherbergi mannsins á heimili þeirra en einnig í fóðurbætisgeymslu og skógrækt á landareign mannsins.

Maðurinn neitaði sök allan tímann en sagði stúlkuna margoft hafa sofið í rúmi sínu en það hefði yngri dóttur hans einnig oft gert. Þá væri svo hljóðbært í húsinu að útilokað væri að lifa kynlífi í hjónaherberginu öðruvísi en það heyrðist á milli herbergja. Þá væri fráleitt að hann hefði stundað kynlíf í fóðurgeymslunni þar sem móðir stúlkunnar kæmi oft þangað þar sem þau væru með frystikistu þar í geymslu.

Maðurinn kvaðst ekki þekkja stúlkuna af lygi en hún hafi átt til að stríða bræðrum sínum. Framburður stúlkunnar, sem tekinn var upp í Barnahúsi, þótti trúverðugur. Var framburður hennar eins og hún væri að lýsa eðlilegri háttsemi sem hún hefði alist upp við frá því hún myndi eftir sér. Þó kvaðst hún hafa vitað frá upphafi að háttsemi stjúpföður hennar væri ekki eðlileg en hann hefði strax í upphafi sagt henni að þetta væri leyndarmál þeirra tveggja.

Dómurinn taldi útilokað að fjórtán ára barn gæti skáldað slíka frásögn. Þá segir einnig að miðað við líkamlegt ástand stúlkunnar við læknisskoðun, svo og heilsufar síðastliðið ár, verði ekki skrifað á neitt annað en mikla kynferðislega misnotkun og andlega erfiðleika í kjölfarið.

Þá kom einnig fram fyrir dómi að maðurinn og móðir stúlkunnar hættu að deila herbergi þegar stúlkan var tíu ára gömul. Það þótti renna stoðum undir frásögn stúlkunnar.

Maðurinn var sýknaður af fyrri ákærunni, að hafa káfað á brjóstum hennar og kysst hana frá því hún var fimm ára gömul. Hann var hinsvegar dæmdur í átta fangelsi fyrir hin brotin.

Sveinn Andri Sveinsson lögmaður mannsins segir að ekki sé búið að taka endanlega ákvörðun um hvort dómnum verði áfrýjað til Hæstaréttar en býst fastlega við að svo verði gert.

„Í fyrsta lagi vegna þess að skjólstæðingur minn hefur haldið fram sakleysi sínu allan tímann og gerir það enn og hinsvegar í ljósi þess að refsingin er hærri en dómafordæmi segja til um," segir Sveinn Andri sem að öðru leyti vildi lítið tjá sig um dóminn.

Þetta mun vera þyngsti dómur sem fallið hefur hér á landi í kynferðisbrotamáli.