Segja stöðu Samherja sterka þrátt fyrir efnahagsóvissu

Forsvarsmenn sjávarútvegsfyrirtækisins Samherja fullyrða að staða fyrirtækisins sé sterk þrátt fyrir óvissu í efnahagsmálum. Fyrirtækið hafi ekki farið varhluta af ástandinu en Samherji verði ekki fyrir eins miklum áhrifum því fyrirtækið sé alþjóðlegur matvælaframleiðandi.

Á heimasíðu fyrirtækisins segir að mikil hagræðing hafi orðið hjá því undanfarin ár og mun betri afkoma erlendrar starfsemi styrki félagið til þess að takast á við þau verkefni sem menn standi frammi fyrir.

„Allt frá árinu 2006 hefur íslenska krónan verið mjög sterk og óhagstæð útflutningsgreinum. Við þessar aðstæður hefur Samherji hægt á fjárfestingum, selt eignir og hagrætt í rekstrinum. Því er fyrirtækið undir það búið að mæta þeim erfiðleikum sem nú steðja að. Undanfarnar vikur hefur síðan verið unnið sleitulaust að því að aðlaga reksturinn að breyttum aðstæðum hér á landi og á mörkuðum okkar erlendis. Helstu viðfangsefni á því sviði tengjast greiðsluflæði til og frá fyrirtækinu og samstarfsfyrirtækjum þess," segir á heimasíðu Samherja.

Bent er á að staðan á heimsmarkaði sé viðkvæm og enginn geti í raun sagt til um þróun næstu mánaða. Engu að síður sé núverandi staða Samherja sterk og félagið í stakk búið til að standa af sér þá erfiðleika sem að steðja.