„Starfið verður auglýst í fyllingu tímans“

Júlíus Vífill Ingvarsson, borgarfulltrúi Sjálfstæðisflokksins, segir að um það hafi verið rætt innan meirihlutans að fá sterkan aðila að málefnum miðborgarinnar. Gríðarlegir hagsmunir séu í húfi og óvissutímabil framundan. Hann segist þeirrar skoðunnar að auglýsa eigi öll störf innan borgarkerfisins en að gild rök geti verið fyrir því að gera á því undantekningu eins og gert var þegar Jakob Frímann Magnússon var ráðinn framkvæmdastjóri miðborgar. Hann segist gera ráð fyrir að starfið verði auglýst í fyllingu tímans.

„Það var um það rætt innan meirihlutans að nauðsynlegt væri að fá öflugan einstakling í þessi mál," segir Júlíus Vífill í samtali við Vísi. „Þarna eru gríðarlegir hagsmunir í húfi og tímabil mikilla breytinga í miðbænum er framundan. Það er því mikilvægt fyrir borgaryfirvöld að hafa augu og eyru í miðborginni.

Aðspurður hvort eðlilegt hefði verið að auglýsa starfið segir Júlíus: „Þetta mátti gera þetta með tvennum hætti, að auglýsa starfið eða fara þá leið sem borgarstjóri kaus og ráða í starfið tímabundið. Það hefði eflaust verið meiri friður um ráðninguna ef hún hefði verið auglýst en borgarstjóri ákvað að fara aðra leið." Að mati Júlíusar hefur Ólafur fært ágætis rök fyrir þeirri leið sem hann fór í málinu. „Sem meginreglu tek ég undir að æskilegt sé að öll störf borgarinnar séu auglýst, en á því geta verið undantekningar og fyrir því er hægt að færa rök. En ef þetta verkefni gefur góða raun geri ég ráð fyrir að því verði haldið áfram og þá verður starfið auglýst í fyllingu tímans.

Nafn Jakobs Frímanns kom upp í umræðunni innan meirihlutans eftir að ákveðið var að koma stöðunni á fót. „Ég get vitnað um það að á þeim fundum sem ég kom að vegna málefna miðborgarinnar var rætt um að setja þyrfti framkvæmdastjóra en þá var ekki minnst á nein nöfn í því sambandi. Nafn Jakobs kom því upp á seinni stigum málsins en þegar nafn hans bar á góma var almennt tekið vel í það að fá hann til verksins. Það var svo borgarstjóri sem sá um ráðninguna enda á hans könnu að gera það," segir Júlíus Vífill Ingvarsson.