Fimm milljarða lánsheimild vegna leiguíbúða

Ríkisstjórnin samþykkti á fundi sínum í morgun tillögu Jóhönnu Sigurðardóttur, félags- og tryggingamálaráðherra, um að veita fimm milljarða króna lánsheimild til Íbúðalánasjóðs vegna leiguíbúða.

Ákvörðunin er tekin í framhaldi af yfirlýsingu ríkisstjórnarinnar um aðgerðir á fasteigna- og fjármálamarkaði. Þannig verða leiguíbúðalán veitt þeim aðilum í þeim sveitarfélögum þar sem eftirspurn eftir leiguhúsnæði er fyrir hendi. Nær heimildin til leiguíbúðalána á almennum markaði vegna íbúða sem ekki seljast.

„Lánað verður til íbúða sem hafa náð að minnsta kosti fokheldisstigi 1. júlí 2008. Til að takmarka útlánaáhættu Íbúðalánasjóðs vegna lánanna verða ekki veitt lán til íbúða í sveitarfélögum þar sem leiguíbúðir fjármagnaðar af Íbúðalánasjóði standa auðar. Uppfylli íbúðirnar þessi skilyrði getur Íbúðalánasjóður veitt lánsvilyrði en lánin greiðast út þegar íbúðirnar eru fullbúnar og þinglýstur leigusamningur til eins árs liggur fyrir," segir á vef félags- og tryggingamálaráðuneytisins.